A vespa velutina provoca grandes perdas na apicultura.

A vespa velutina provoca grandes perdas na apicultura.

Cada apicultor gasta mil euros de media en loitar contra a velutina

Un estudo da Deputación da Coruña analiza os efectos económicos da praga da vespa asiática na apicultura

A aparición da praga da vespa velutina ten consecuencias que van moito máis alá dos ataques ás abellas autóctonas e da mobilización no campo para combater a esta especie. Por primeira vez comezan a darse pasos para analizar as consecuencias económicas deste fenómeno e a Deputación da Coruña fixo un estudo, con datos de 2016, entre preto de 90 explotacións apícolas da provincia para coñecer os custos que supoñen para os apicultores facer fronte á praga, sen contar os danos na produción de mel.

Trampa artesanal para velutinas nunha explotación apícola

Trampa artesanal para velutinas nunha explotación apícola

Os resultados indican que o custe medio por explotación oscila entre os 987 e os 1.221 euros, aínda que hai que ter en conta que o número de colmeas por explotación é moi variable. Hai que sinalar que os datos non reflicten as cantidades realmente invertidas en combater a praga senón a avaliación da perda de tempo e de recursos que supón enfrontarse á mesma.

Ana Isabel García Arias, coordinadora da parte económica do estudo da Deputación sobre a velutina, indica que os apicultores consultados apuntan un investimento do 20% do valor da súa produción anual en  recursos para loitar contra a praga. “Cremos que o estudo pode ser unha boa ferramenta para que os apicultores podan tomar decisións e decidir cales son os medios máis efectivos e rendibles para enfrontarse á velutina”, engade García Arias.

O custo de enfrontarse á praga ronda os mil euros por explotación

A economista da USC explica que o estudo tamén aporta pistas sobre a evolución da praga en Galicia. Por exemplo, en 2016 o 21% dos apicultores entrevistados sinalaron que sufriron perdas de produción superiores ao 50% respecto ao ano anterior. De tódolos xeitos hai que sinalar que non se pode concluír que toda a caída da produción débese á velutina xa que puideron influír outros factores pero semella claro que a extensión da praga foi un dos elementos que motivou esta caída.

Entre os custes que se tiveron en conta para realizar o estudo se inclúen a asistencia a cursos de formación, a retirada de niños, a habilitación de trampas, mallas protectoras,arpas eléctricas e outros artefactos e a alimentación artificial das colmeas. Non se inclúen aquí os custes derivados das perdas de produción nas explotacións.

O estudo permite tamén extraer algunhas conclusións sobre as características do sector apícola coruñés. Trátase en xeral dun sector pouco profesionalizado, en mans de persoas xubiladas ou que exercen o traballo de apicultor a tempo parcial. Hai algunas explotacións grandes pero a media de colmeas por explotación é de 21 aínda que o que máis abunda son as explotacións con dúas colmeas.

O que máis abunda na provincia son as explotación con dúas colmeas

García Arias apunta que podería facerse estudos similares sobre outros sectores como o das explotación de árbores de froita e de viñedo porque está claro que a praga da velutina tamén lles afectou. Outra das cuestión pendentes sería avaliar o impacto que poden ter os diversos medios de combater a praga sobre o entorno natural e sobre a propia vespa asiática.

O que está claro é que o impacto da praga está a ser considerable no campo galego e ten consecuencias económicas importantes, mesmo tamén nas cidades. Hai poucos días o Concello de Santiago apuntaba que o ano pasado as saídas dos Bombeiros para retirar niños no concello pasaron de 366 en 2016 a 1.359 en 2017. Do total de niños retirados 1.311 pertencían a velutinas. O dato da unha idea da intensidade na expansión da praga e dos efectos económicos que implica, neste caso para o erario público.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.