Únete á nosa canle de Whatsapp
A canle de divulgación científica da Universidade de Vigo, Divulgare, estrea o vídeo ‘O perigo das mascotas nas illas’. Este traballo audiovisual “fala dos problemas que, desde o ámbito científico, están a detectarse en relación á posesión e tráfico de mascotas. Nel facemos mención expresa ao problema dos gatos en ecosistemas insulares”, indica Luís Navarro, profesor do departamento de Bioloxía Vexetal.
O vídeo de Divulgare advirte do problema que xeran os gatos nas illas, tras ser abandonados por persoas que as visitan. Os gatos están asilvestrados e están a provocar que outros animais como os anfibios ou as aves non leven ben a presenza dos felinos. O traballo amplía outros vídeo xa feitos sobre os gatos no Parque Nacional das Illas Atlánticas de Galicia.
Moitos dos felinos, unha vez chegan á súa nova contorna, comezan a competir polos recursos con outros organismos que non están preparados para defenderse dun predador tan eficiente. “Con este vídeo, incómodo para moitos, pretendemos chamar a atención dun problema que está a afectar, agora xa a gran escala, á conservación da nosa biodiversidade. Non é un problema menor e por iso temos que implicarnos en buscar solucións entre todos”, engade.
