Morre Bens, o lobo mariño rescatado na Coruña

O lobo mariño Bens non sobreviviu tras do seu rescate pola Coordinadora para o Estudo dos Mamíferos Mariños (CEMMA), a entidade encargada en Galicia da atención aos varamentos na costa galega. Na mañá do xoves día 4 de febreiro, a alerta da policía local da Coruña puxo en marcha á unidade móbil de asistencia á fauna mariña. Un exemplar macho de lobo mariño cincento (Halichoerus grypus) acababa de chegar ao areal da praia de Bens na Coruña. Os técnicos determinaron que o seu grave estado de saúde obrigaba a trasladalo á Unidade de Coidados Intensivos do Centro de Coordinación de Varamentos da CEMMA, en Nigrán (Pontevedra).

O mesmo xoves ás 17:00 h ingresou. E foille detectada unha grave deshidratación, desnutrición, anorexia e esgotamento extremo. “Durante os seguintes días aplicáronse as técnicas de hidratación oral e suepidérmica e comezouse dar alimentación ao animal, mais non respostou axeitadamente”, afirma a CEMMA: “Neste tempo non recuperou actividade nin remontou a situación crítica coa que chegou varar”.

Publicidade

Na mañá do luns día 8 o estado do lobo mariño empeorou, caendo as súas constantes vitais e falecendo posteriormente. “A pesar dos esforzos dos especialistas, Bens non puido remontar o crítico estado co que chegou á costa galega”, explica a CEMMA nunha nota.

A necropsia evidenciou todo aquilo que a sintomatoloxía amosaba: o dixestivo absolutamente baleiro, pouca graxa ademais da presenza de dous plásticos pequenos no estómago. Se ben estes plásticos non teñen que ver directamente coa morte do animal, a CEMMA pensa que debería “facernos reflexionar sobre o uso e xestión dos residuos”.

Actualmente, estamos en tempada de forte presenza e varamentos de lobos mariños, que vai de novembro a abril. O empeoramento das condicións mariñas acrecenta a posibilidade de que máis exemplares cheguen á costa fuxindo das duras condicións do mar.

Medidas se atopas un lobo mariño

A CEMMA sinala que, aínda que pensemos que nunca nos imos atopar cun lobo mariño, as posibilidades de atopalos entre Fisterra e Ribadeo, durante a tempada invernal, non é tan rara. Por iso publica unha serie de recomendacións a ter en conta en caso de varamento:

– Chegan directamente dende as colonias de cría do norte e polo tanto están moi cansos, motivo polo cal poden baixar a terra a descansar e botar unha soneca tranquilamente.

– NON ACHEGARSE para evitar molestalo ou que responda agresivamente, mantendo unha distancia prudente xa que poden atacar e trabar.

– NON BLOQUEAR A VÍA DE FUXIDA cara ao mar, deixándolle unha alternativa por se quere e pode marchar.

– ATAR OS CANS se os levas, e procurar que non se acheguen ou a ataquen.

– MANTER SILENCIO, os berros e barullo porano alerta e nervioso.

– AVISAR canto antes ao 112 e colaborar coa Rede de Varamentos nas indicacións.

Hai que ter en conta que non todos os animais que chegan á costa precisan ser recollidos, só aqueles feridos ou que persisten en ficar no mesmo lugar durante días e amosen un comportamento patolóxico.