Imaxes da expresión xénica destas especies de fagáceas. Foto: CSIC.

Imaxes da expresión xénica destas especies de fagáceas. Foto: CSIC.

O CSIC afonda na mellora xenética de carballos, sobreiras e castiñeiros

A tese da investigadora galega Saleta Rico identificou xenes implicados na propagación destas especies, claves para o sector forestal

Estímase que a demanda mundial de madeira duplicarase no ano 2040. Os bosques naturais, por tanto, veranse seriamente comprometidos para cubrir este aumento do consumo. Por tanto, a mellora xenética das especies existentes, para garantir un crecemento máis eficiente e rápido, é unha das liñas de investigación clave para os científicos que traballan no eido forestal.

Coñecer o xenoma das especies mellorará a produción forestal

A tese de doutoramento presentada pola bióloga galega Saleta Rico Santos no CSIC podería aportar novidades significativas nesta problemática. Identificou sete xenes do castiñeiro, do carballo e da sobreira que están implicados en procesos clave para a súa propagación vexetativa, é dicir, para a reprodución dunha nova planta a partir dun tecido, unha célula ou un órgano da planta nai. Coñecer a fondo estes dous procesos, a embrioxénese somática e o enraizamento adventicio, axudará a explorar as vías de regulación e sinalización dos citaos xenes, modular a súa actividade e así reprogramar células diferenciadas para dar lugar á formación de embrións e raíces adventicias.

“As fagáceas -ás que pertencen estas tres especies- están amplamente distribuídas por todo o hemisferio norte e teñen un elevado interese forestal. Debido ás súas limitacións biolóxicas, a investigación xenómica foi menor que nas coníferas. Non en tanto, é importante avanzar nesta liña posto que esta familia inclúe especies de gran interese económico e ecolóxico”, apunta Saleta Rico.

Pola súa parte, a directora da tese, Concepción Sánchez Fernández, científica do CSIC e xefa do grupo de Biotecnoloxía de Especies Leñosas do Instituto de Investigacións Agrarias de Galicia (IIAG), sinala que a biotecnoloxía forestal, liña de traballo desde hai decenios no IIAG, “é clave para garantir o futuro e a sostibilidade das especies forestais”.

A investigación realizouse no marco dos proxectos “Análise funcional de xenes da familia GRAS no enraizamento de especies forestais”, apoiado polo Mineco, e “Caracterización de xenes de castiñeiro implicados en procesos morfoxenéticos de interese para a propagación de árbores seleccionadas”, da Xunta de Galicia.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.