Únete á nosa canle de Whatsapp
Os novos datos de temperaturas globais publicados polo programa Copernicus da UE amosan que o período de 12 meses que acabou a finais de outubro rexistrou as temperaturas máis calorosas. A imaxe mensual do programa de monitoraxe da Terra da UE é a última antes de que o mundo se reúna en París no COP21 para ver de acadar un acordo climático global. Os datos do programa Copernicus tiveron participación galega, a través do Centro de Supercomputación de Galicia (Cesga), que empregou a súa capacidade de cálculo para procesar o inmenso volume de información recibida.
O dato de 2015 como o máis caloroso na Terra foi revelado polo representante especial de Reino Unido en cambio climático David King, durante o evento celebrado na Tech City de Londres.
Xa o primeiro semestre foi o máis caloroso dende que hai rexistros globais de clima (1880). A temperatura global da terra e dos océanos foi case un grao (0,85ºC) superior á media do século XX. A temperatura global da Terra foi 1,34ºC superior e a dos mares un 0,67ºC. Ademais, todos os océanos experimentaron un aumento.
O programa Copernicus conta coa rede de satélites Sentinel da UE, ademais miles de sensores de terra e mariños, millóns de lecturas cada hora e un arquivo de datos centenario. O enorme volume de datos da atmosfera e do clima da Terra que sustentan o programa está en mans de gobernos e institucións de xeito libre. En Galicia, o Cesga ten procesado moita desta información para participar nas conclusións do programa.
O Cesga proporciona os seus supercomputadores para procesar os datos de Copernicus
O Centro IBI de Monitorización e Predición (IBI- MFC) é responsable de xerar predicións operativas diarias de océano, dende as Illas Canarias a Irlanda. Este centro recaba datos grazas a Puertos del Estado, que son procesados polo Cesga, nos seus súpercomputadores situados en Santiago de Compostela.
Cesga proporciona infraestruturas de computación de altas prestacións e de rede de comunicación necesarias. O resultado non é só unha medición da evolución do clima na rexión atlántica europea, senón previsións a curto prazo, duns 5 días, de correntes e outras variables oceanográficas, como temperatura, salinidade e nivel do mar, así como para obter una mellor comprensión da dinámica do océano.
