.

.

Nace un proxecto para xestionar o cabalo galego de monte con drones e GPS

Universidade da Coruña, a Asociación Rapa das Bestas de Sabucedo e varias empresas e institucións colaboran na iniciativa

A Asociación Rapa das Bestas de Sabucedo, a Universidade da Coruña, o Centro de Investigacións Agrarias de Mabegondo e a empresa 3eData, nacida ao abeiro do Campus Terra da USC, están poñendo en marcha un proxecto destinado a mellorar a xestión do cabalo bravo de monte desde varias perspectivas.

A iniciativa baséase en dúas liñas de acción. Por unha banda, a nivel tecnolóxico, búscase facilitar o manexo do cabalo, minimizar os problemas e ampliar o coñecemento sobre o uso dos cabalos como ferramenta de xestión forestal. Por outro lado, desde o punto de vista divulgativo, tamén se pretende mellorar a visión que a sociedade ten desta actividade.

O proxecto terá dúas liñas de acción, a nivel tecnolóxico e divulgativo

Para desenvolver este traballos, empregaranse novas tecnoloxías, como o marcaxe dos cabalos con GPS e o uso de drones para localizar os equinos nas zonas máis remotas e inaccesibles, amais de peches que eviten os problemas de tráfico causados pola súa proximidade ás estradas.

Outro dos obxectivos, a nivel social, é a redución dos conflitos entre os besteiros e os propietarios forestais e a diminución do risco de incendios a través da redución da biomasa, empregando os cabalos. Segundo sinalan os impulsores da iniciativa, os resultados repercutirán directamente sobre a poboación de cabalos de Sabucedo, pero tamén “serán de gran interese para besteiros en todas as zonas de Galicia en que se atopan estas poboacións de cabalos bravos”.

A iniciativa está financiada pola Xunta de Galicia e os fondos Feader

A idea xurdiu en xuño de 2017, cando a asociación que organiza a coñecida rapa constituíu un grupo de innovación grazas a unha axuda da Xunta de Galicia destinada á “creación de grupos operativos de innovación da Asociación Europea de Innovación en materia de produtividade e sustentabilidade agrícola e forestal”. O obxectivo era conformar un grupo destinado a identificar e analizar os problemas aos que se enfronta o cabalo bravos nos montes galegos e o seu manexo tradicional, para así atopar solucións a estes inconvenientes. Ademais, o proxecto conseguiu financiamento na convocatoria de “axudas para a execución de proxectos dos grupos operativos da Asociación Europea da Innovación (AEI)”, cofinanciadas co Fondo Europeo Agrícola de Desenvolvemento Rural (Feader).

Amais da Asociación Rapa das Bestas, a UDC, o Centro de Investigacións Agrarias de Mabegondo e a empresa 3eData, participan na iniciativa varias entidades públicas e privadas, como as asociacións de besteiros de Sabucedo, A Groba (Baiona) e Carballo (Friol), centros de investigacións como o Centro Tecnolóxico da Carne, asociacións que desenvolven iniciativas de promoción e asesoramento a produtores de equino, como Puraga, entidades conservacionistas como a Asociación Galega de Custodia do Territorio, e institucións con experiencia no eido cultural e antropolóxico destas celebracións, como o Instituto de Estudos Miñoráns.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.