Dúas novas especies de bolboretas foron atopadas no Parque Nacional das Illas Atlánticas por investigadores que publican o seu achado na revista Braña, da Sociedade Galega de Historia Natural. As dúas novas especies son Favonius quercus e Plebejus argus, que elevan a 46 o número de especies de bolboretas presentes nas illas do parque.
“A partir dunha revisión das especies rexistradas polo autor neste espazo, cítanse Favonius quercus e Plebejus argus por primeira vez para o Parque Nacional Marítimo-Terrestre das Illas Atlánticas de Galicia, incorporando estas dúas especies ó catálogo de especies rexistradas no Parque Nacional”, explica o autor do artigo, Xosé Luis Rey-Muñoz.
Favonius quercus foi localizada nos límites da carballeira existente na Illa de Cortegada durante unha incursión para a recompilación de rexistros biolóxicos. Plebejus argus foi localizada na Illa de Ons durante unha prospección entomolóxica realizada ó longo da illa. “Este exemplar situábase na beira do camiño nunha zona de matogueira densa”, explica o autor do achado, que salienta que o exemplar “foi identificado e liberado no mesmo lugar da captura”.