A avespiña do castiñeiro, orixinaria de China.

A avespiña do castiñeiro, orixinaria de China.

Agricultura soltará parasitos no monte contra a avespiña do castiñeiro

Usarán un inimigo natural para controlar a praga que pon en perigo o 80% da produción de castañas en Lugo e na Coruña

Comeza a batalla contra a avespiña do castiñeiro. E o aliado para frear o seu avance en Galicia será un parasito natural deste insecto. Os produtores de castañas levaban tres alertando de que estaba en perigo o 80 % da colleita, no caso de que non se adoptasen medidas urxentes. E o Ministerio de Agricultura e Medio Ambiente vén de anunciar que haberá soltas controladas de Torymus sinensis, en Galicia e en Andalucía para o control biolóxico do insecto que empeza a expandirse de forma exponencial polos soutos de Lugo e da Coruña.

A liberación experimental do antagónico da avespa do castiñeiro, que terán que traer de Francia ou de Italia, un país no que a praga acabou co 80 % da colleita e que empeza agora a recuperarse, vai realizarse nos meses de abril ou de maio. Nesta iniciativa participarán expertos do Consello Superior de Investigacións Científicas (CSIC) e da Estación Fitopatológica de Areeiro, en Pontevedra.

A avespiña é orixinaria de China e está presente en España dende 2012

O uso dun parasito natural da avespiña considérase un método eficaz para limitar a súa expansión de forma natural, é dicir, sen utilizar insecticidas. Torymus sinensis e tamén unha especie exótica, polo que a súa utilización no medio natural debe realizarse baixo o principio de precaución e coas investigacións necesarias para coñecer o seu efecto ambiental sobre a biodiversidade nativa.

A avespiña do castiñeiro induce a aparición de lesións nestas árbores, o que causa perdas notables na produción do froito. Na actualidade, está a afectar aos bosques e arboledo disperso de castiñeiro, provocando graves danos tanto na produción de castañas como na conservación do ecosistema no seu conxunto.

Este insecto exótico orixinario de China estendeuse de xeito progresivo nas últimas décadas por todo o mundo. A súa presenza en América detectouse nos anos 70 e en 2002 en Italia, onde o sector aínda está a recuperarse das graves perdas rexistradas. A avespiña do castiñeiro está presente en España desde 2012, cando se detectou por vez primeira en Cataluña.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.