Únete á nosa canle de Whatsapp
A perkinose é unha enfermidade causada polo parasito Perkinsus olseni. É unha doenza letal para a ameixa xapónica, unha das variedades con maior niver de produción e comercialización en Galicia e España. Agora, unha tese da USC, presentada por Abul Farah Md. Hasanuzzaman, da Khulna University de Bangladesh, trata de indagar nos mecanismos moleculares que están detrás desta enfermidade. O traballo de Abul Farah, un investigador procedente de Bangladesh que recalou na USC a través do programa Erasmus Mundus, recibiu a máxima cualificación.
Este avance é un requisito esencial para desenvolver estratexias que permitan o control da perkinose. O autor da tese descubriu algúns dos mecanismos empregados polo parasito para superar as defensas inmunitarias da ameixa. Ademais, a análise integrada da interacción parasito-ameixa permitiu coñecer as causas da etioloxía e progreso da enfermidade, elementos que fornecen información clave para poder desenvolver estratexias de prevención, control e selección de estirpes resistentes a esta parasitose.
A tese recaeu baixo a dirección de Paulino Martínez e Belén Gómez e o tribunal encargado de avaliala estivo presidido por Antonio Villalba García, do Centro de Investigacións Mariñas dependente da Consellería do Mar da Xunta de Galicia. Completaron o tribunal o profesor de Xenética da Universidade de Vigo Ángel Eduardo Pérez Diz e a profesora titular do Departamento de Xenética da USC, Carmen Bouza Fernández.
