Un estudo do CSIC desvela as goridas dos polbos nas illas Cíes

O grupo Ecobiomar, do Instituto Investigacións Mariñas do CSIC, vén de detectar as zonas óptimas para o crecemento das larvas de polbo común (Octopus vulgaris) no entorno das illas Cíes. O descubrimento é froito de máis de trinta campañas de estudo a bordo do buque Mytilus, no marco do proxecto de investigación Lareco (Larval Ecology), que contou coa colaboración das universidades de Aberdeen (Escocia) e Lisboa (Portugal).

O estudo desvelou que as larvas de polbo non son partículas inertes que se distribúen de forma aleatoria na auga, senón que habitan en áreas concretas que facilitan a súa supervivencia porque alí atopan as condicións abióticas e o alimento adecuado para o seu crecemento óptimo.

Publicidade

Do mesmo xeito, o traballo identificou a dieta das larvas a través de novedosos métodos de bioloxía molecular e xenómica. Observouse que se alimentan, fundamentalmente, de varias familias de crustáceos, sobre todo decápodos, así como de varias familias de peixes e plancton.

O estudo utilizou novidosos métodos para identificar a dieta das larvas

Ángel F. González, investigador principal do proxecto e xefe do grupo, destaca que levan “casi vinte anos” investigando as larvas de polbo nas rías galegas, onde se produce un afloramento estacional e a especie “soporta a pesquería artesanal máis importante de Europa”. Insiste González na importancia de abordar de xeito “multidisciplinar” a “influencia dos parámetros atmosféricos e oceánicos da ría de Vigo na abundancia, distribución e ecoloxía trófica das larvas”. O investigador subliña tamén que “esta información ten unha notable importancia para o desenvolvemento do cultivo integral da especie”, xa que ata agora se descoñecía na natureza “a escala mundial” cales eran os alimentos apropiados para as larvas.

O traballo de campo realizouse arredor do Parque Nacional das Illas Atlánticas mediante trinta campañas nocturnas de 12 horas e catro campañas de 24 horas. Os resultados destas investigacións publicaronse en importantes revistas como Fisheries Oceanography ou Progress in Oceanography.