Mariñeiros e científicos, xuntos falando de mar. Porque este mércores se presentou na Facultade de Ciencias do Campus de Ourense a publicación Pez espada: pesca, composición, química y valor nutricional, un estudo realizado pola Área de Tecnoloxía dos Alimentos da Universidade de Vigo, en colaboración coa Organización de Palangreiros Guardeses (Orpagu). Este traballo é a culminación da colaboración entre as dúas partes, que naceu no 2012 a raíz dun proxecto de I+D que tiña como obxectivo optimizar o proceso para obter unha conserva de peixe espada de calidade que permitise diversificar e dar valor engadido a este produto e sector.
“Este proxecto e esta publicación son unha demostración de como entre o mar e a universidade somos capaces de facer traballos de máximo nivel internacional”, destacou durante a presentación da publicación Joaquín Cadilla, presidente da Organización de Palangreiros Guardeses.
O estudo profundou na produción de peixe espada en conserva
O libro presentado este mércores tamén recolle información sobre a composición e o valor nutritivo do peixe espada, co fin de mostrar os beneficios do seu consumo. “Trátase dun peixe semigraxo e cun alto valor proteico. O equilibrio dos seus aminoácidos e, en particular, a elevada relación entre os esenciais e o non esenciais, determina a excelente calidade do peixe espada como alimento”, apúntase na publicación. É tamén, engaden as autoras do libro, importante destacar o seu contido en ácidos graxos omega 3, así como en vitaminas B e B3, entre as hidrosolubles, e en vitaminas A e D, entre as liposolubles. Deste xeito, recóllese na publicación, o achegue desta última nunha ración de peixe espada é máis de tres veces o recomendado como inxesta diaria. Respecto aos minerais, o selenio contido nunha única ración de peixe espada cobre máis do 100% da cantidade recomendada ao día. “A información desta publicación quere mostrar as calidades nutritivas dun produto de consumo mundial, así como o esforzo e o traballo que se esconde trala pesca e comercialización do peixe espada”, comentou Inmaculada Franco, unha das autoras da publicación, xunto a Noemí Cobas e Sidonia Martínez.
España é o primeiro produtor de peixe espada, cun 28,4% das capturas mundiais
A publicación recolle os estudos preliminares feitos no proxecto, titulado Optimización tecnolóxica para a valorización e aproveitamento de subprodutos do peixe espada. “Esta é unha mostra dos bos resultados que pode dar a relación entre empresa e universidade”, recalcou Francisco Javier Rajo, director de Infraestruturas e Desenvolvemento do campus. “Para nós foi moi importante dar este paso de traballar coa universidade”, engadiu Joaquín Cadilla, que fixo fincapé na satisfacción de ver como “mesturando o que sabemos nós, que somos os mariñeiros, co que sabe a universidade” tamén desde Galicia se pode facer I+D relevante para o sector.
Para esta organización, a Área de Tecnoloxía dos Alimentos, comentou Inmaculada Franco, analizou a composición bioquímica e microbiolóxica de mostras de peixe espada de diferentes pesos e océanos para seleccionar as de mellores características e fixo a optimización do proceso produtivo para obter unha conserva de calidade, dando resposta ás deficiencias detectadas por Orpagu. nas primeiras conservas elaboradas. A conserva, apuntan desde a organización, ten na actualidade moi boa acollida, especialmente en tendas especializadas polo súa calidade e diferenciación.
Na actualidade, explicouse durante a presentación do libro no Edificio Politécnico, España é o primeiro produtor de peixe espada, representando o 28,4% das capturas mundiais. Neste contexto, Orpagu., indicaron os seus responsables, é a asociación española con máis palangreiros dedicados á pesca desta especie e de especies afíns, cunha cifra que en 2015 ascendeu a 36 palangreiros que capturaron arredor de cinco millóns de quilos deste peixe polos diferentes océanos.