Mexillóns en rocha. Imaxe: A. Trepte.

Mexillóns en rocha. Imaxe: A. Trepte.

Os mexillóns máis carnosos danse con invernos secos e veráns de nordés

Un estudo do CSIC, en colaboración coa empresa Proinsa, analizou a influencia da meteoroloxía nos bivalvos criados na ría de Ares e Betanzos

Os invernos secos, as primaveras temperás e os veráns onde predomina o nordés favorecen o rendemento da carne dos mexillóns. Así o conclúe un estudo do CSIC, realizado en colaboración coa empresa Proinsa na ría de Ares e Betanzos. A investigación forma parte do proxecto europeo ClimeFish, que avalía os impactos do cambio climático na acuicultura e nas pescarías europeas.

Para chegar a esta conclusión, os científicos do CSIC recolleron datos dos mexillóns cultivados entre 2001 e 2012 por Proinsa. Avaliáronse as diferenzas no rendemento da carne dependendo da estación, así como as variacións duns anos a outros. Como variables meteorolóxicas empregáronse a radiación solar, os ventos costeiros e a descarga fluvial. Así, estes factores inflúen na temperatura da superficie do mar e, por tanto, na dispoñibilidade de alimento, o que condiciona o crecemento dos mexillóns.

O cambio climático afecta especialmente ao afloramento nas rías

Os resultados, publicados na revista Ecological Indicators, indican, por tanto, as condicións máis axeitadas para obter uns mexillóns máis carnosos. Así, o traballo establece a utilidade de vincular o rendemento da carne do mexillón coas condicións meteorolóxicas, utilizándoas para predicir a variabilidade estacional e interanual do rendemento en carne de mexillóns.

Este factor, segundo apuntan os investigadores, “permite inferir como podería afectar o cambio climático á calidade do cultivo de mexillón”, sobre todo en zonas sensibles ao afloramento, como son as rías galegas. “Nas últimas décadas, o índice de afloramento costeiro experimentou un descenso nas costas galegas, o que podería implicar unha ralentización da recuperación estival do rendemento da carne desde o seu mínimo en primavera. Non en tanto, dado que as proxeccións climáticas para o século XXI apuntan a unha intensificación do afloramento, cabe esperar un aumento da recuperación estival no rendemento da carne, que redundaría, á súa vez, en maiores rendementos comerciais para o cultivo”, conclúen os investigadores.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.