Únete á nosa canle de Whatsapp
Un equipo composto por trinta científicos da Universitat de les Illes Balears, o CSIC e o IEO, entre os que están representantes do Centro Oceanográfico de Vigo, comezaron esta semana en Palma de Mallorca as reunións de traballo do proxecto Clifish, que estudará, desde diversas perspectivas, o impacto do cambio climático na pesca e nos ecosistemas mariños do Mediterráneo occidental e o Atlántico nororiental. Dentro desta tarefa, os investigadores realizarán predicións e proxeccións da evolución futura desta situación.
O proxecto Clifish, financiado polo Plan Estatal de I+D+I, dependente do Ministerio de Economía e Competititivade, está coordinado polo Instituto Español de Oceanografía, supón a continuación doutros traballos anteriores, como Idea, Ideados e Eclipsame. Está dividido en catorce casos de estudo que se organizarán en tres subproxectos, coordinados por cada un dos organismos. O IEO encargarase do estudo da dinámica de poboacións e comunidades sometidas á explotación pesqueira, a UIB traballará sobre o estudo e modelado de escenarios de cambio climático e de factores oceanográficos que inflúen na dinámica poboacional dos recursos mariños. E por último, o CSIC, a través do Institut de Ciències del Mar, analizará a diversidade, distribución e bioloxía de crustáceos decápodos e da ecomorfoloxía de comunidades.
O proxecto Clifish contempla tamén a aposta pola divulgación da investigación do clima e das pesquerías, que se verá favorecida pola participación desta iniciativa no portal Observadores del Mar, unha web que complia observacións e experiencia de cidadáns sobre fenómenos que teñen lugar en alta mar para aplicalo na investigación mariña.
