Rosa Menéndez, Alberto Núñez Feijoo, Carmen Vela e Antonio Figueras, durante o acto de sinatura do acordo. Imaxe: xunta.gal.

Rosa Menéndez, Alberto Núñez Feijoo, Carmen Vela e Antonio Figueras, durante o acto de sinatura do acordo. Imaxe: xunta.gal.

Acordo para trasladar os centros do CSIC ao novo Campus do Mar

A Xunta cederá os seus terreos na Escola de Transmisións e Electricidade da Armada (ETEA) para as instalacións do IIM e a Unidade de Tecnoloxía Mariña

O Consejo Superior de Investigaciones Científicas (CSIC) e a Xunta de Galicia asinaron este venres o convenio de acordo para o traslado do Instituto de Investigacións Mariñas (IIM) e a Sede Atlántica da Unidade de Tecnoloxía Mariña ás antigas instalacións da Escola de Transmisións e Electricidade da Armada (ETEA), onde tamén se ubicará a nova sede institucional do Campus do Mar da Universidade de Vigo.

O acordo contempla a cesión dunha parcela de máis de 15.000 metros cadrados, ubicada no barrio de Teis, no interior da ría de Vigo. Á firma acudiron o presidente da Xunta, Alberto Núñez Feijoo, a Secretaria de Estado de Investigación, Desarrollo e Innovación, Carmen Vela, a presidenta do CSIC, Rosa Menéndez, e o director do IIM, Antonio Figueras.

Rosa Menéndez destacou que a cesión da parcela “vai contribuír a seguir desenvolvendo en Galicia ciencia de excelencia no eido das ciencias do mar”, e a secretaria de Estado de I+D+I afirmou que este acordo era “un gran paso adiante“.

Tras a sinatura do acordo, Antonio Figueras resaltou que “a renovación total das instalacións do centro supón un estímulo para as nosas investigacións, que se verán favorecidas. A situación da nova sede, en plena ría, é idónea, pois teremos ata o noso propio embarcadoiro”. Engadiu o director do IIM que, coas novas instalacións, converteranse “nun centro de referencia mundial, desde o punto de vista da infraestrutura, as técnicas, tecnoloxías, disciplinas e innovación, e moi conectado ao mundo da empresa, porque non ten sentido que se faga ciencia que non reverta na sociedade”.

Pola súa banda, Alberto Núñez Feijoo sinalou: “O pasado mes de xullo dixemos que estabamos no camiño adecuado para que Vigo e Galicia puidesen liderar a investigación mariña. E hoxe sumamos un socio moi importante para que este compromiso poida facerse realidade”. O presidente da Xunta tamén lembrou que “temos un compromiso que non ten volta atrás: converter a ETEA no centro de referencia de investigacións mariñas de Europa”.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.