Sergio Eiriz, David Losada e Javier Pesado, creadores de iBeeAgro.

Sergio Eiriz, David Losada e Javier Pesado, creadores de iBeeAgro.

O teléfono decide cando regar

Tres enxeñeiros crean IBeeAgro, un sistema para xestionar explotacións agrícolas dende o PC ou o móbil

Do rumbo pouco afortunado dunha empresa naceu o proxecto emprendedor de tres socios que buscan abrir novos horizontes no campo da monitoraxe ambiental. A súa idea é instalar estacións agroclimáticas que detecten os parámetros climáticos tanto das plantas como do terreo e que estes datos analícense de forma inmediata por un software propio que ofrece ao agricultor un resumo coas necesidades do cultivo adaptado ao que desexe saber cada produtor. Como un parte diario que guía as accións para realizar sobre a plantación e sen necesidade de fiarse do instinto.  “É un sector baseado na tradición, nos usos e costumes, así que facemos tamén labor didáctica. Explicamos que coa monitoraxe ambiental pódense reducir custos, mellorar a produción, aforrar en recursos como a auga, os fitosanitarios ou a electricidade”, explica Sergio Eiriz, un dos socios. Defende que o seu produto é “o máis novo” que se pode atopar no mercado porque ofrece unha solución “de extremo a extremo”. É dicir, un só provedor ofrece o sistema de vixilancia e análise da información.

iBeeAgro_Tool-Info_Parcela

O produto comézase a comercializar neste mes de marzo despois de case dous anos de investigación e desenvolvemento do hardware e do software. Desde o pasado verán levan realizando probas de campo e con enxeñeiros agrónomos, que son os responsables de indicar onde se deben situar as estacións bioclimáticas. A súa instalación piloto atópase nun viñedo ecolóxico da denominación de orixe Ribeiro. Alí miden a humidade e temperatura ambiental, a presión atmosférica, a radiación solar, a humidade da folla, o potencial hídrico, a temperatura do chan e a dirección e velocidade do aire e a cantidade de choiva. Todos estes datos transfírense por GPRS a iBeeAgro Tool, o programa que dirá directamente o agricultor os riscos que ten o cultivo de padecer enfermidades, como debe xestionar a rega e mesmo levar o caderno de campo da explotación. Como se trata dun servizo na nube, o usuario pode estar pendente do seu terreo dende calquera lugar no que teña o seu smartphone (ou un computador) e acceso a Internet. Ou tamén pode crear alertas que lle avisen a través dun email ou un sms cando se rexistren situacións anómalas ou riscos para o cultivo. “Agora estamos a traballar tamén na automatización das ordes, para que a plataforma poida xestionar a rega, dar directamente a orde se é necesario”, indica Eiriz.

Tras do éxito no Ribeiro, IBeeAgro levan agora a súa experiencia a Estremadura

Os campos de proba ampliaranse en breve con dúas novas experiencias piloto en Estremadura, onde “os cultivos sofren unha ou dúas enfermidades ao ano” e fanse máis necesarias as estacións que saiban recoñecer os indicios e alertar a tempo.  O sistema está pensado para terras de extensión superior ás cinco hectáreas, polo que a súa aplicación en Galicia limitaríase “ao sector da viticultura ou mesmo no da pataca”. “Pero non pechamos a porta a nada”, apunta.

É agora, despois de anos de traballo, cando comeza o labor comercial e tamén a finalización da parte empresarial coa constitución da empresa. Están á espera dos certificados europeos para comezar. “Imos saír a vender o produto xa. Tivo moi boa acollida entre os enxeñeiros agrónomos e hai interese no sistema porque non é a típica estación meteorolóxica”, indica Eiriz.

iBeeAgro Inicio

De momento onde si triunfaron é nos premios de innovación empresarial. Gañaron un dos premios da IV edición dos Premios Incuvi-Emprende da Universidade de Vigo en 2015 e iso permitiulles instalarse no niño 28 do Parque Empresarial de Galicia e contar co apoio necesario para levar a cabo o plan de negocio e a parte máis administrativa da empresa, na que apenas tiñan experiencia os tres enxeñeiros técnicos que iniciaron a empresa, David Losada e Javier Pesado, ademais de Sergio Eiriz. De feito, sinalan, foi esta parte de xestión a máis complicada que tiveron que afrontar debido á dispersión e a escaseza da información do  sector, que dificultou a realización do plan de empresa, a análise de mercado e a fixación de prezos de venda. O proxecto iBeeAgro tamén foi seleccionado dentro do programa Open Future de Estremadura para financiar start ups con posibilidades de crecemento e na segunda edición do programa Open Future en Galicia xunto a outras 49 empresas que apostan polas teconoloxías da información. Tras unha fase inicial de formación empresarial, tres empresas serán seleccionadas e apoiadas con financiamento. Cando se decida, iBeeAgro xa estará a competir polo seu espazo no mercado.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.