Keila Pousa, Edurne Sendra e Sofía Calvo, creadoras de Calabizo.

Keila Pousa, Edurne Sendra e Sofía Calvo, creadoras de Calabizo.

O chourizo vexetal existe (e está delicioso)

A particular proposta de Calabizo superou as expectativas das súas tres confundadoras

A pesar de que a oferta gastronómica foise adaptando nos últimos anos ao público vexetariano, ata a creación de Calabizo había dous sabores que este colectivo botaba en falta. Edurne Sendra, directora técnica e unha das cofundadoras desta empresa xunto a Keila Pousa e Sofía Calvo, lembra que esta última traballara durante tempo como cociñeira en restaurantes vexetarianos. A partir do contacto con esta tendencia alimentaria, observou que “os dous sabores que máis botaban de menos eran o xamón e o chourizo”, conta Edurne.

Por mor disto, as tres reuníronse para desenvolver a súa idea. Un produto moi específico, pero con moito potencial. Puxeron en común as súas distintas áreas de coñecemento: restauración (Sofía), enxeñería agrónoma (Edurne), e márketing e turismo (Keila). Máis tarde, despois de máis dun ano de traballo, conseguiron ser finalistas de Vía Galicia, o que lles deu o impulso definitivo para facer realidade a súa idea.

“Lembra aos embutidos de aldea de outrora”, afirma Edurne Sendra

No proceso de elaboración dos Calabizos, I+D e tradición danse a man. “A receita é moi similar á dun chourizo tradicional, pero intercambiamos a carne de porco por polpa de cabaza e a graxa por aceite de oliva virxe extra”, explica Edurne Sendra. O afumado, o curado e o secado tamén son similares, aínda que varían as condicións de temperatura, humidade e tempos. Así, ademais da cabaza e o aceite, a receita incorpora pemento, ourego, cebola, allo e sal.

Desta maneira, obtense un produto que, segundo Edurne, cumpre coas ‘4s’ (saudable, sustentable, saboroso e sen aditivos nin conservantes). Porque o Calabizo, segundo afirman as súas creadoras “regula o colesterol, achega fibra alimentaria, é rico en vitaminas e antioxidantes, baixo en calorías, a materia prima obtense baixo as prescricións da agricultura ecolóxica e con métodos tradicionais” e, ademais, “recupera o sabor de antes, porque lembra aos embutidos de aldea de outrora”.

Envase de Calabizo.

Envase de Calabizo.

Para achegarse máis aos clientes, Calabizo ofrece a variedade vexetariana e vegana. Ambos os produtos pódense consumir en cru ou á prancha. Na variedade vegana, a envoltura é vexetal, no canto de coláxeno, polo que non se recomenda a cocción, que si é posible na variedade vexetariana, xa que pode entrar auga no interior.

A resposta dos consumidores foi excelente. “Excedeu as nosas previsións, ata o punto de que aínda non puidemos atender todos os pedidos”, sinala Sendra. Os encargos chegan mesmo doutros puntos de Europa, como Reino Unido, Alemaña, Francia. A pesar disto, as creadoras manteñen o seu plan: “De momento non podemos exportar xa que primeiro queremos poder atender o mercado nacional”. Ademais, tamén chegaron os premios. O Clúster Alimentario de Galicia outorgoulles o premio ao Produto Innovador de 2016.

 

Unha resposta a “O chourizo vexetal existe (e está delicioso)”

  1. Susana

    O chourizo tradicional galego foi precisamente este chourizo de cabaza e cebola. Ao popularizarse a carne e chegar a todas as casas, empezou a introducirse neste tipo de chourizos, dando lugar aos ceboleiros que inda hoxe se fan sobre todo na provincia de Ourense. Mais a miña nai, por exemplo, lembra os chourizos ceboleiros con cabaza que se facían cando era nena, antes de que houbera carne, e eses eran os chourizos tradicionais. De feito, nalgunha zona do oriente ourensán inda se elaboran. O que fixeron nesta empresa foi recuperar este tipo de chourizos e comercializalos como “Calabizos” cun éxito rotundo, porque ademais de estar moi bos, co auxe do veganismo o público obxectivo é cada vez máis amplo. Chourizos tradicionais galegos polo mundo adiante cun éxito enorme.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.