Únete á nosa canle de Whatsapp
Pyrkaia Firing System, un sistema de creación, deseño e xestión de espectáculos de pirotecnia, resultou gañador do certame convocado pola iniciativa Yuzz na USC. O seu creador, David Sánchez Silva, viaxará a Silicon Valley para coñecer de preto o principal polo de innovación do mundo.
O sistema desenvolto por David Sánchez consiste nun programa informático que simula un espectáculo de pirotecnia e son. Grazas ao software utilizado, as empresas do sector poden deseñar e sincronizar miles de efectos pirotécnicos e previsualizar o espectáculo sen necesidade de facer probas reais. Este avance permite ás empresas de pirotecnia aforrar ata un 70 por cento de custes.
O programa Yuzz ofreceu durante cinco meses apoio, formación e asesoramento a un grupo de 25 emprendedores universitarios, seleccionados entre máis de 70 solicitantes, para desenvolver o seu plan de negocio e converter as súas ideas en proxectos empresariais.
