“Cada fogar tira ó ano entre 450 e 680 euros ó ano por non aplicar medidas de eficiencia enerxética; unha cousa que chama moito a atención aos economistas é por que non se fai máis neste campo, cando gañamos todos: aforramos cartos e protexemos o medio”. Así se expresa Xavier Labandeira, catedrático de Economía na Universidade de Vigo e un dos fundadores de Ergon, o gran consorcio europeo sobre eficiencia enerxétia, que viviu hoxe o seu acto fundacional na illa de A Toxa.
A comunidade científica sitúa o maior potencial de eficiencia enerxética no sector residencial, seguido polo do transporte e, por último, o industrial. Por este motivo, o parque de edificios e vivendas será o principal ámbito de traballo da primeira plataforma europea de investigación sobre economía da eficiencia enerxética (Ergon, www.ergoneconomics.com) presentada en A Toxa (Pontevedra), no marco do Workshop Atlántico sobre Economía Enerxética e Ambiental.
O centro galego Economics for Energy lidera o consorcio europeo Ergon
O consorcio está formado polo centro galego Economics for Energy, o Centro para a Investigación Económica Europea (ZEW, con sede en Alemaña), o Instituto Federal de Tecnoloxía de Zürich (ETH Zürich, en Suíza) e a Fundación Eni Enrico Mattei (FEEM, en Italia). Os catro coordinadores da plataforma, representantes dos centros socios, participaron na presentación: Xavier Labandeira, Andreas Loeschel, Massimo Filippini e Massimo Tavoni.
Unha referencia mundial
A decisión de celebrar a presentación de Ergon a nivel internacional no marco do congreso que se celebra en Galicia débese a que o evento está dedicado nesta edición á eficiencia enerxética e a que nel se reúne a elite científica mundial en temas de enerxía, medio e economía.
Os datos que manexa a comunidade científica sosteñen que un fogar medio español podería aforrar entre 450 e 680 euros ao ano con melloras no illamento e o cambio a sistemas de iluminación, equipos de calefacción e electrodomésticos máis eficientes. Segundo diferentes estudos revisados polo Panel Intergobernamental de Cambio Climático (IPCC) da ONU, un edificio de nova construción que incorpore os últimos avances tecnolóxicos e de deseño en materia de eficiencia pode reducir as súas necesidades enerxéticas ata nun 75%.
A eficiencia enerxética medrou un 12% na UE nunha década
A nivel europeo, durante a década 2000-2010 foi o sector residencial o que experimentou un maior incremento no seu nivel de eficiencia enerxética. No conxunto da economía, esta aumentou un 12% en toda a Unión Europea, pero a tendencia desacelerouse durante os anos da crise, afectando máis negativamente aos sectores industrial e do transporte.
As perspectivas a nivel mundial apuntan a que os sectores residencial e comercial presentan un potencial de aforro enerxético que podería alcanzar o 29% en 2020.
“A eficiencia enerxética implica poder facer o mesmo con menos enerxía, polo que é un medio para que as empresas e familias paguen menos polos seus consumos enerxéticos sen prexudicar o seu benestar”, explicou Xavier Labandeira, que engadiu aos beneficios a redución de importacións de petróleo e gas e a limitación de emisións contaminantes, tanto a nivel local coma no referente ao cambio climático.
Cambio climático
Neste contexto, os coordinadores de Ergon coincidiron en recomendar aos responsables políticos a aplicación de políticas efectivas de apoio á eficiencia enerxética para fomentar o aforro e conter o cambio climático.
As razóns para que non se produzan as melloras necesarias neste ámbito, especialmente nos sectores residencial e empresarial, serán o obxecto principal de análise para Ergon. “Cales son as barreiras que fan que a xente invista menos do que debería?, carencia de recursos económicos?, falta de información?, pouca concienciación?, falta de incentivos axeitados?”, formulou o director de Economics for Energy como as cuestións clave ás que a plataforma europea tratará de dar resposta dende unha perspectiva baseada na colaboración, coa achega das diferentes visións do norte e o sur de Europa e coa vocación de achegar recomendacións que sexan útiles para o deseño de políticas eficaces dende o nivel comunitario (Comisión Europea) ao municipal.
Ergon estudará por que o cidadán non actúa malia ó evidente aforro económico
“Na Unión Europea estamos por detrás dos obxectivos que nos marcamos neste ámbito e hai varios sectores nos que hai que actuar de xeito especial, sobre todo o dos edificios e o do transporte”, indicou Andreas Loeschel.
Pola súa banda, Massimo Filippini incidiu en que dende Ergon se vai traballar moi especialmente para analizar o comportamento do consumidor, co obxectivo de poder suxerir medidas que realmente motiven ao cidadán para aforrar enerxía. “Os nosos estudos demostran que os incentivos económicos non sempre funcionan e hai que explorar outras vías que partan dunha análise psicolóxica ede conducta”, expuxo.
Expertos de 11 países
Ergon é a primeira iniciativa deste tipo en Europa, tomando o exemplo de plataformas como as participadas nos Estados Unidos por institucións de primeiro nivel como o Instituto Tecnolóxico deMassachusetts (MIT) e a Universidade de Berkeley. Ademais de estar aberto a novos centros europeos de referencia na materia que queiran unirse como socios, Ergon conta xa coa colaboración da Universidade do Estado de Arizona e prevé sumar novas alianzas a nivel mundial.
O Workshop Atlántico sobre Economía Enerxética e Ambiental chega á súa sexta edición convertido en cita de referencia a nivel mundial neste ámbito. Os expertos de 11 países de todo o mundo que participan no congreso presentan entre hoxe e mañá os resultados máis relevantes das súas últimas investigacións. Os relatorios científicos están a cargo dos maiores especialistas a nivel internacional na materia, chegados de Alemaña, Italia, Francia, Suíza, Reino Unido, Portugal, Australia, Xapón, Estados Unidos, Chile, ademais de España.
Muy bien, pero cuantos podemos comprar un piso o casa de última tecnología, sin enpufarnos ? Ya sabemos lo que pasó y está pasando con quien compró viviendas con hipoteca a muchos años vista. Pues claro que sería ideal tener las viviendas bien aisladas, un consumo energetico moderado y equilibrado y todo eso, pero si no hay pasta, malamente se puede conseguir