Curso de asesoramento TIC

Curso de asesoramento TIC. Foto: Axencia para a Modernización Tecnolóxica de Galicia (AMTEGA).

Conexión móbil, empresas e Administración electrónica tiran da Galicia dixital

O novo informe da Fundación Telefónica revela que malia as melloras, a penetración de Internet nos fogares galegos é menor que a media estatal

Mesa de traballo de GCiencia

Mesa de traballo de GCiencia.

Os fogares e empresas galegos están máis e mellor conectados a Internet, e gozan dun dos mellores servizos de Administración electrónica do Estado. Estas son as principais conclusións do informe anual La Sociedad de la Información en España 2013 da Fundación Telefónica, no que, malia as melloras notables identificadas no desenvolvemento das tecnoloxías da información e da comuncación (TIC) en Galicia, se detectan aínda diverxencias respecto á media estatal.

O informe tamén salienta que o sector TIC empeza a ter especial relevancia no tecido empresarial de Galicia, que se sitúa como quinta comunidade autónoma en número de empresas de tecnoloxía da información e da comunicación (2.029), cun crecemento do 2,7% e 15.144 postos de traballo.

Cidadáns

O informe revela que o 68,5% dos fogares galegos dispoñen de ordenador e que a conexión a Internet se disparou en máis de 11 puntos porcentuais nos últimos dous anos, até o 64,7%. Unha porcentaxe que, en todo caso, segue sendo moi discreta respecto ó 69,8% da media estatal. Ademais, a penetración da banda ancha nas vivendas galegas creceu un 1,7 puntos respecto ao ano 2012, até o 64%, pero segue lonxe da media española, cunha diferenza de 4,9 puntos.

Porén, Galicia destaca no segundo posto das comunidades autónomas en conexión móbil a Internet: un 55,2% das viviendas con conexión á rede accede a través de un dispositivo móbil por banda ancha, 8 puntos porcentuais máis que a media estatal.

Administración electrónica

A comunidade galega tamén ocupa unha posición destacada no uso da eAdministración. Un 61,5% dos internautas galegos obtivo información de páxinas web da Administración (5,5 puntos máis que a media estatal) e un 43,1% descargou formularios oficiais (3,5 puntos máis que a media estatal). Este datos colocan os servizos da Administración electrónica galega no segundo posto en España

Os servizos da Administración electrónica galega sitúanse no segundo posto en España

Tamén creceu a interacción das empresas galegas coas administracións públicas a través dos servizos en liña. En concreto, detectouse un incremento dun 2,7% respecto ao ano anterior, até acadar o 88,4% de empresas de 10 e más empregados que interactuaron coa eAdministración no ano 2013. Indicadores que colocan o uso e utilidade da Administración electrónica galega por enriba da media estatal, tanto na obtención de información como na descarga e tramitación de impresos. Así, un 57,3% das mpresas galegas obtivo impresos en liña da Xunta de Galicia e un 47,4%  entregounos vía Internet, é dicir, 3 e 1,8 puntos máis que a media do Estado, respectivamente.

Galicia tamén é pioneira en España no sistema de facturación electrónica, que recibiu neste formato o 30% das facturas desde a súa posta en marcha no ano 2010.

Empresas

No eido empresarial, o máis salientable é que, por primeira vez, as microempresas galegas converxen coa media estatal na dispoñibilidade de ordenador e conexión a Internet. A porcentaxe destas empresas que dispoñen de ordenador disparouse un 13,6% e é xa dun 71,2%, só catro décimas por debaixo da media estatal, que só creceu un 0,4%.  Ademais, a conexión a Internet das microempresas de Galicia creceu un 12,3%, até o 64,9%, pero aínda está 6,6 puntos por debaixo da media do Estado.

Entre as microempresas con conexión a Internet, un 90,8% dispón de banda ancha fixa e un 52,2% de banda ancha móbil, cun crecemento do 35,2%. E un 28,1% destas empresas con conexión á rede dispón de páxina web, un 15,2% máis que o ano anterior, cunha diferenza de só 1,2 puntos coa media estatal.

As empresas galegas de 10 ou máis empregados con conexión a Internet superan a media estatal

O informe da Fundación Telefónica calcula que un 98,2% das empresas galegas de 10 ou máis empregados teñen contratada conexión a Internet, superando a media estatal (98%). Ademais, un 99,3% destas dispoñe dunha conexión de banda ancha, accedendo o 64,8% a través de telefonía móbil. Un 56,4% ten unha velocidade entre 2 Mbps e 10 Mbps, e un 29,6% entre 10 Mbps e 30 Mbps.

No referente á presenza en liña, un 64,4% destas empresas dispoñe de páxina web. E o 74,4% utiliza software de código aberto, 3,9 puntos máis que a media estatal.

Outro aspecto destacado das empresas galegas deste segmento con conexión a Internet é o emprego da firma dixital, utilizada por un 72,4%, superando a media estatal en 0,6 puntos. E entre as novas tendencias nas solucións TIC no eido empresarial, empezan a salientar a computación en nube, utilizada por un 16,3% destas empresas e a participación en medios sociais en liña por parte dun 25,6%. Un 11,6% empregou ademais canles en Internet de contidos multimedia.

Cara e cruz, pois, para a Galicia dixital, que sobresae na conexión móbil a Internet e a utilidade da Administración electrónica, pero que ten aínda que facer un gran esforzo por achegarse aos países máis desenvolvidos na penetración de Internet entre os cidadáns, á vez que asenta o crecemento do uso das TIC nas empresas máis pequenas.

A continuación móstrase a infografía da Fundación Telefónica cos datos máis salientables para Galicia.

galicia-digital-números

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.