Traballos arqueolóxicos no Campo do Castro, en Cedeira. Imaxe: cedeira.gal.

Traballos arqueolóxicos no Campo do Castro, en Cedeira. Imaxe: cedeira.gal.

Atopan en Cedeira unha sauna de vapor castrexa duns 2.000 anos

O equipo do arqueólogo Emilio Ramil localizou esta estrutura, coñecida como 'pedra formosa'; é a quinta que se atopa en Galicia

Un equipo de arqueólogos dirixidos por Emilio Ramil atopou a pasada semana na punta do Sarridal, en Cedeira, unha ‘pedra formosa‘, a quinta localizada ata o momento en Galicia, durante uns traballos que están desenvolvendo na zona de Campo do Castro, na punta do Sarridal, a carón do mar. Ramil explicaba, nunha información recollida na web do concello cedeirense, que as pedras formosas forman parte dos coñecidos como “monumentos con fornos“, unhas construcións vinculadas á cultura castrexa e utilizadas para tomar baños de vapor, ao estilo dunha sauna. A estrutura atopada en Cedeira consta dun adro, unha antecámara, na que tamén existe un banco, unha cámara e unha entrada ao forno.

Segundo as evidencias atopadas, Ramil sitúa a construción desta sauna entre os séculos I a.C. e II-III d.C. O director da escavación destacou o excelente estado de conservación das estruturas, aínda que desapareceron a maioría das lousas do pavimento da cámara e a ‘pedra formosa’ que dividía as dúas cámaras e impedía a saída do calor do forno ao exterior. Este forno aínda permanece oculto, polo que aínda podería haber novos datos sobre este achado. En todas as estancias tamén se atoparon restos de cerámicas da época castrexa que aínda están pendentes de seren analizadas.

Pedra formosa conservada no castro de Borneiro (Cabana de Bergantiños). Imaxe: Lansbricae / CC BY-SA 2.0.

Pedra formosa conservada no castro de Borneiro (Cabana de Bergantiños). Imaxe: Lansbricae / CC BY-SA 2.0.

As outras pedras formosas atopadas en Galicia están en Santa María de Augas Santas, Borneiro. Tamén hai constancia deste tipo de estruturas en Asturias e Portugal.

O equipo de Emilio Ramil nesta ocasión estivo integrado por catro arqueólogos máis -Víctor Tomás Botella, Ánxo López Felpeto, José Ramón Martínez Casal e David Abella- e cinco auxiliares -Xoán Carneiro Herrero, Carlos Rodríguez López, Macarena Teijido Ferreiro, Mónica Legaspi e Sara Ramil Blanco, ademais de Alejandro Ramil Blanco que levou a cabo o traballo audiovisual captado coas imaxes obtidas por un dron.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.