Únete á nosa canle de Whatsapp
A Xunta investirá 4 millóns de euros ata 2017 no concurso de ideas ‘Fabricación Avanzada 4.0’, que servirá para escoller e financiar os mellores proxectos piloto de fábrica intelixente levados a cabo por organismos intermedios e pemes galegas. O conselleiro Francisco Conde resaltou que o concurso de ideas se activará nas próximas semanas e poderán participar nel consorcios formados por un organismo intermedio e polo menos 3 pemes, que presenten proxectos conxuntos para aplicar tecnoloxías da Industria 4.0 ás empresas participantes. De entre todos os que se presenten, a Xunta escollerá catro proxectos para que sexan levados a cabo “e convertan aos seus protagonistas en pioneiras na industria 4.0 en Galicia”, resaltou.
“A Industria 4.0 é unha oportunidade única para incrementar a competitividade do noso tecido empresarial”, dixo Conde, “pero para alcanzar esas metas, necesitamos que se xere entre o empresariado galego unha masa crítica de compañías concienciadas coa necesidade de adaptarse á nova revolución” industrial. Neste senso, lembrou que é unha visión que está a ser asumida en todo o mundo, con exemplos como Alemaña, que xa conta coas primeiras fábricas piloto de firmas como Siemens ou Basf; Corea do Sur, que está a vivir grandes cambios lexislativos para adaptarse a ela; ou a Unión Europea, que puxo en marcha estratexias como a iniciativa Vanguard -na que se atopa Galicia-.
A industria 4.0 integrará as novas tecnoloxías nunha nova revolución industrial
No eido español, resaltou que o Estado lanzou o programa Industria Conectada 4.0, que traballa de forma paralela á galega Axenda da Competitividade Galicia-Industria 4.0, que pivotando sobre a fábrica intelixente busca que a industria galega pase do 13,5% ao 20% sobre o PIB, creando 50.000 empregos ata 2020. “Trátase dunha estratexia centrada no talento, no emprendimiento industrial e especialmente na innovación, poñendo o foco precisamente sobre a fábrica intelixente”, dixo Conde.
A estratexia, resaltou, aborda os catro grandes retos que trae consigo a Industria 4.0: en primeiro lugar, á integración vertical de sistemas de produción intelixentes, impulsada polo internet das cousas, dos servizos, dos datos e da xente. En segundo lugar, sinalou Conde, a Industria 4.0 supón a integración horizontal dunha nova xeración de redes globais de creación de valor, marcada pola transparencia integrada, a flexibilidade, a optimización e coordinación, a trazabilidade, e a capacidade de adaptarse ás especificacións do consumidor non só no deseño e produción, senón ata na distribución, abrindo a porta a novos modelos de cooperación interempresarial.
Alemaña xa conta con plantas piloto intelixentes de marcas como Siemens ou Basf
Como terceira clave desta revolución, defendeu, destaca a “reenxeñería de toda a cadea de valor, de punta a punta”, introducindo cambios que afectan a todo o ciclo de vida dun produto. “Pronto, algúns produtos imprimiranse en 3D directamente no fogar dos consumidores, que se limitarán a comprar en internet un arquivo co seu deseño”, sinalou Conde, que destacou que esta nova modalidade de negocio obrigará a repensar os sistemas de protección de copia, as leis de propiedade intelectual, o imposto de aduanas e mesmo o IVE.
E por último, o panorama da Industria 4.0, salientou o conselleiro, complétase coa aceleración de tecnoloxías novas ou que xa existían, pero que “só recentemente fomos capaces de producilas en masa e de forma barata”, como os avances en intelixencia artificial e robótica avanzada que permitan a convivencia en espazos reducidos de robots e persoas; os novos sensores, máis baratos e avanzados, que se integran nos produtos; os vehículos sen condutor para o transporte intrafabril, e os drones de mantemento para facer inventorio e loxística dentro do almacén; os sistemas de produción e análise do chamado Big Data; e a produción aditiva ou impresión 3D.
