Únete á nosa canle de Whatsapp
ValentinaTereshkova foi a primeira muller en ir ao espazo. En 1963, pasou case tres días orbitando a Terra un total de 48 veces na súa cápsula espacial, a Vostok 6. Esa foi a súa única viaxe espacial. Cúmprense agora 55 anos deste fito.
Valentina Vladimirovna “Valya” Tereshkova naceu o 6 de marzo de 1937 en Maslennikovo, unha vila preto do río Volga a uns 277 quilómetros ao nordés de Moscova. Os seus pais traballaban nunha granxa colectiva, e o seu pai foi asasinado durante a Segunda Guerra Mundial. Valentina deixou a escola cando tiña 16 anos e traballaba nunha fábrica téxtil, pero continuou a súa educación a través de cursos por correspondencia.
Tereshkova uniuse á liga de Mozos Comunistas da fábrica (Komsomol) e pronto avanzou no Partido Comunista. Os seus primeiros voos foron en paracaídas despois de unirse ao Yaroslavl Air Sports Club.
Despois de que Yuri Gagarin se convertese no primeiro home no espazo en 1961, Tereshkova marchou como voluntaria para o programa espacial soviético. Aínda que non tiña ningunha experiencia como piloto, foi aceptada no programa debido aos seus 126 saltos en paracaídas. Nese momento, os cosmonautas tiñan que saltar en paracaídas desde as súas cápsulas segundos antes de tocar o chan ao regresar á Terra.
Xunto con outras catro mulleres, Tereshkova recibiu 18 meses de adestramento, que incluíron probas para determinar como reaccionaría durante longos períodos de tempo estando soa, en condicións de gravidade extrema e en condicións de gravidade cero. Das cinco mulleres, só Tereshkova foi ao espazo.
Tereshkova foi elixida para pilotar a Vostok 6. Tiña que ser unha misión dobre. O cosmonauta Valeriy Bykovsky saíra a bordo da Vostok 5 o 14 de xuño de 1963. Dous días máis tarde, lanzouse Tereshkova. As dúas naves espaciais tomaron diferentes órbitas e atopáronse a 3 millas (5 km) entre si. Os cosmonautas intercambiaron comunicacións.
Tereshkova rexistrou máis de 70 horas no espazo e fixo 48 órbitas da Terra. Os televidentes soviéticos e europeos viron a súa cara sorrinte e o seu caderno de bitácora flotando fronte a ela. Non se deron conta de que o voo case se converteu nunha traxedia, un feito que foi clasificado durante uns 40 anos.
Un erro no software de navegación automática da nave espacial provocou que a nave se afastase da Terra. Tereshkova notouno e os científicos soviéticos rapidamente desenvolveron un novo algoritmo de aterraxe. Tereshkova aterrou a salvo, pero quedou cun hematoma na cara. Aterrou na rexión de Altay, preto da actual fronteira entre Kazaxistán, Mongolia e China. Os aldeáns axudaron a Tereshkova a saír do seu traxe espacial e pedíronlle que se lles unise para cear. Ela aceptou, e logo foi reprendida por violar as regras e non someterse primeiro a exames médicos.
Con todo, Tereshkova foi honrada co título Heroe da Unión Soviética. Ela recibiu a Orde de Lenin e a Medalla da Estrela de Ouro. Converteuse en voceira da Unión Soviética e, mentres cumpría coa súa función, recibiu a Medalla de Ouro das Nacións Unidas para a Paz.
Valentina Tereschkova xamais regresou ó espazo. Continuou a súa vida pública, centrando a súa carreira na política. Aos seus 81, hoxe continúa a ser deputada da Duma Estatal Rusa.
