Un grupo de investigadores da Universidade Cornell de Nova York conseguiu que naza a primeira camada de cachorros de can por fecundación in vitro, un logro que podería axudar a salvar especies en perigo de extinción. O avance, publicado na revista especializada Public Library of Science ONE, tamén podería supoñer un paso adiante para combater as enfermidades hereditarias nos cans, así como para estudar o desenvolvemento das enfermidades congénitas, xa que os cans comparten máis de 350 trastornos e trazos hereditarios cos humanos.
Para conseguir a fecundación, os investigadores transferiron 19 embrións previamente tratados á cadela escollida para xestar, a cal deu a luz a sete cachorros sans, dous dunha nai beagle e un pai cocker spaniel, e cinco a partir de dúas parellas de pais e nais beagle. “Desde mediados da década de 1970, a xente estivo tratando de facer isto nun can e non tiveron éxito”, dixo Alex Travis, profesor asociado de bioloxía reprodutiva no Instituto Baker de Sanidade Animal, na Facultade de Medicina Veterinaria de Cornell.