Morre Duches, a tigresa do zoo de Vigo

O equipo veterinario de Vigozoo decidiu aplicar este luns a eutanasia á tigresa Duches, enferma de cancro desde hai meses. A súa saúde deteriorouse nas últimas semanas, chegando a unha situación irreversible. A tigresa fora trasladada hai uns meses ao Hospital Veterinario Universitario Rof Codina de Lugo para extirparlle un tumor na pel. Naquel momento descartouse a metástasis coa realización dun TAC. O cancro non é unha doenza común nos animais salvaxes, pero si pode ser habitual nas feras que, como Duches, proceden de circos, onde é habitual aparear exemplares que poden dar lugar a alteracións xenéticas.
Duches seguiu tratamento de quimioterapia e baixo supervisión dos veterinarios, pero nas últimas semanas comezou a perder peso de xeito paulatino. No últimos dez días, deixou de alimentarse e chegou a pesar un terzo do que correspondería a un exemplar das súas características. Por iso, a súa situación era irreversible. Polo que os técnicos optaron por aplicarlle a eutanasia para evitar sufrimentos innecesarios ao animal. Así mesmo, o Concello informou de que, unha vez explorada, se lle detectou unha úlcera gástrica, que será analizada.