Os pintores urbanos Louis Masai e Jim Vision crearon estes murais con abellas para concienciar á poboación do problema da diminución destes animais en todo o mundo. As obras forman parte da campaña ‘Save the Bees’ (‘Salva as abellas’), que comezou en Londres como resposta artística ó tema urxente da diminución das poboacións de polinizadores. As abellas son fundamentais para a polinización das flores e resultan necesarias para a sostibilidade da agricultura en todo o mundo. Xa non resulta descoñecido, para quen queira estar informado, que estamos a enfrontarnos a un problema de dimensións desproporcionadas no que se refire á perda de polinizadores, tamén denominado colapso de polinización. Arredor do 75% dos cultivos vexetais humanos requiren ser polinizados por insectos, principalmente abellas.
Louis Masai comezou a súa aventura despois de regresar a Gran Bretaña dunha viaxe a Sudáfrica, onde aprendeu a importancia que teñen nos ecosistemas estes himenópteros. Pronto contou coa colaboración de Jim Vision para crear estes murais nas rúas de Londres.
Os murais van acompañados de mensaxes para concienciar á xente sobre os riscos da desaparición das abellas para o noso planeta: “Cando nos vaiamos, levarémonos a todos vostedes connosco”.
A campaña comezou nas rúas de Londres e xa se estendeu no Reino Unido a Bristol, Devon e Glastonbury, ou en Estados Unidos a Nova York, Miami e Nova Orleans.
Masai xa creou máis murais adicados a especies en perigo de extinción. No seu ánimo está “cuestionar por que os humanos non sinten a extinción das especies do mesmo xeito que a morte dunha celebridade”.
Os dous artistas pintan as abellas detalladas morfoloxicamente ata o último detalle e tamén enxames destes insectos.