A campaña de base longa de ALMA produciu unha imaxe dunha galaxia afastada vista a través dunha lente gravitatoria que alcanza un nivel de detalle impresionante. A imaxe mostra unha vista ampliada das rexións de formación estelar da galaxia, dun tipo que nunca se vira antes a este nivel de detalle nunha galaxia tan remota. As novas observacións son moito máis detalladas que as realizadas co telescopio espacial Hubble de NASA/ESA e revelan cúmulos de formación estelar na galaxia equivalentes a versións xigantes da nebulosa de Orión. A campaña de base longa de ALMA produciu algunhas observacións sorprendentes, proporcionando información detallada sen precedentes sobre os habitantes do universo próximo e afastado. A campaña de observacións, realizada a finais de 2014, tiña como obxectivo unha galaxia afastada coñecida como SDP.81. A luz procedente desta galaxia é vítima dun efecto cósmico coñecido como lentes gravitacionais. Unha gran galaxia que se encontra entre SDP.81 e ALMA actúa como unha lupa, deformando a luz da galaxia máis distante e creando un exemplo case perfecto dun fenómeno coñecido como un anel de Einstein. Polo menos seis grupos de científicos analizaron independentemente os datos da ALMA sobre SDP.81. Este frenesí de artigos de investigación deu a coñecer gran cantidade de información sobre a galaxia, revelando detalles sobre a súa estrutura, contido, movemento e outras características físicas. ALMA actúa como un interferómetro. Noutras palabras, o conxunto de antenas traballa perfectamente sincronizado, recollendo a luz coma se dun único e enorme telescopio virtual se tratase. Como resultado, estas novas imaxes do SDP.81 teñen unha resolución ata 6 veces maior que as tomadas no infravermello co Telescopio Espacial Hubble de NASA/ESA. Os sofisticados modelos elaborados polos astrónomos revelan estruturas do interior de SDP.81 que nunca antes fora observado. Con forma de nubes poeirentas, crese que se trata de repositorios xigantes de gas molecular frío, os lugares nos que nacen estrelas e planetas. Estes modelos foron capaces de corrixir a distorsión producida pola ampliación da lupa gravitacional. Como resultado, as observacións de ALMA son tan precisas que os investigadores poden ver cúmulos de formación de estrelas dentro da galaxia de ata un tamaño de 100 anos luz, o que equivalería a observar, no universo distante, versións xigantes da nebulosa de Orión producindo miles de estrelas novas. Esta é a primeira vez que este fenómeno se viu a unha distancia tan enorme. “A imaxe da galaxia, reconstruída a partir de datos de ALMA, é espectacular” afirma Rob Ivison, coautor de dous dos artigos e director de Ciencia de ESO. “A enorme superficie colectora de ALMA, a gran separación das súas antenas e a atmosfera estable sobre o deserto de Atacama permítennos obter imaxes e espectros cun nivel de detalle exquisito. Iso significa que obtemos observacións moi sensibles, así como información acerca de como avanzan as diferentes partes da galaxia. Podemos ver como galaxias que se encontran ao outro extremo do universo se fusionan e crean un gran número de estrelas. Este é o tipo de cousas que me apaixonan do meu traballo”, comentou. Usando a información espectral recompilada por ALMA, os astrónomos tamén puideron medir como xira a galaxia afastada e estimaron a súa masa. Os datos mostraron que o gas desta galaxia é inestable: cúmulos de gas colapsan no interior e, probablemente, acabaranse transformando en novas rexións xigantescas de formación estelar. En particular, o modelado do efecto de lente tamén indicou a existencia dun burato negro supermasivo no centro da galaxia de primeiro plano que fai de lupa. A parte central de SDP.81 é demasiado débil para ser detectada, o cal leva á conclusión de que a galaxia en primeiro plano ten un burato negro supermasivo con máis de 200-300 millóns de veces a masa do Sol. O número de artigos publicados usando tan só este conxunto de datos de ALMA demostra o entusiasmo xerado polo potencial deste conxunto de antenas de alta resolución e a súa gran capacidade colectora de luz. Tamén mostra como ALMA permitirá aos astrónomos facer máis descubrimentos nos anos vindeiros, respondendo aínda máis preguntas sobre a natureza das galaxias distantes, informa a NASA.
Queres recibir o noso boletín diario coas noticias de Gciencia?
Utilizamos cookies para asegurar que damos a mellor experiencia ao usuario no noso sitio web. Se continúa utilizando este sitio asumiremos que está de acordo.Estou de acordoNonPolítica de Privacidade
Únete á nosa canle de Whatsapp
