IMG_8383

Unha tese da USC analiza as causas da morte programada das lampreas

A través dun traballo sobre biomarcadores metabólicos e de reserva enerxética en lamprea mariña, Sandra Barca Bravo investiga as causas da morte programada despois da reprodución desta especie. A investigadora corroborou como os biomarcadores “revélanse como bos descritores dos cambios que teñen lugar ao longo do ciclo vital” da lamprea, explicando as condicións de crecemento en función da oferta alimentaria tanto en cantidade como calidade, ao tempo que reflicten as condicións ambientais de desenvolvemento, respondendo ás características físicoquímicas e de estres ambiental.

A tese, valorada polo tribunal coa máxima cualificación, dirixírona o profesor da USC Fernando Cobo Grandín e a docente da Universidade da Coruña María José Servia García. O traballo trata de responder tamén a algúns dos principais interrogantes que existen sobre a bioloxía da lamprea e subministra achegas relevantes á metodoloxía de determinación da idade e do tempo de permanencia no río, baseadas na análise dos pigmentos biliares no fígado de exemplares adultos.

Sandra Barco Bravo, que é a encargada do laboratorio e calidade da Estación de Hidrobioloxía ‘ Encoro do Con’ da USC, detectou un incremento dos niveis de lípidos no tecido cardíaco ao final da súa etapa fluvial. Esta acumulación anormal de graxa “é análoga á esteatose do miocardio estudada no home e noutros mamíferos e que pode producirse no caso de diabete, por intoxicación ou por hipoxia”, aclara a doutora Barca Bravo.

O tribunal encargado de avaliar a tese integrárono Rafael Miranda Ferreiro, da Universidade de Navarra; José Carlos Fernandes Antunes, da Universidade de Porto; e Rufino Vieira Lanero, da USC.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.