Antón Álvarez Sousa, no seu ingreso na RAGC.

Antón Álvarez Sousa, no seu ingreso na RAGC.

O sociólogo Antón Álvarez Sousa ingresa na Real Academia Galega de Ciencias

Catedrático da Universidade da Coruña, preside a Asociación Galega de Socioloxía

A Real Academia Galega de Ciencias (RAGC) celebrou no Pazo de San Roque (Santiago) o acto de ingreso de Antonio Álvarez Sousa, catedrático no Departamento de Socioloxía da Universidade da Coruña (UDC), que se integra na Sección de Ciencias Sociais e Económicas. A súa continúa a rolda de incorporacións á institución neste ano, no que en total entrarán catro novos académicos de diversas áreas de coñecemento.

O discurso de ingreso do novo académico da RAGC estaba titulado “Doazón de órganos. Factores sociais e propostas de acción”. Logo de pronuncialo, recibiu a medalla de mans do presidente da RAGC, Miguel Ángel Ríos, e o diploma foille entregado polo reitor da UDC, Julio Abalde.

Álvarez Sousa no seu discurso de ingreso.

Álvarez Sousa no seu discurso de ingreso.

Álvarez Sousa (1960, Cartelle, Ourense) ten no seu haber tres licenciaturas: Filosofía e Ciencias da Educación; Política e Socioloxía; e Comunicación Audiovisual. Obtivo o título de doutor en Ciencias Políticas e Socioloxía pola Universidade Complutense de Madrid, institución que posteriormente lle concedeu o seu primeiro Premio de Investigación na Área de Ciencias Xurídico-Sociais. Na actualidade, é catedrático e decano da Facultade de Socioloxía da UDC.

Ao longo da súa traxectoria, realizou estancias como investigador e como profesor de mestrado e de doutoramento en distintas universidades de Europa, Estados Unidos e América Latina. Na actualidade, combina a dirección do curso de posgrao da UDC sobre Planificación e Desenvolvemento Local coa coordinación do Mestrado e Doutoramento en Planificación e Xestión de Destinos e Novos Produtos Turísticos.

Ademais, preside a Asociación Galega de Socioloxía e o grupo de investigación sobre Turismo e Ocio da Federación Española de Socioloxía, ao tempo que dirixe varios proxectos de cooperación para o desenvolvemento.

O equipo de investigación que coordina estivo ao cargo do desenvolvemento dos plans de excelencia e de dinamización do turismo de varios municipios e comarcas de España. Actualmente, lidera proxectos relacionados co emprendemento turístico no Camiño de Santiago e co Plan de Turismo Galicia 2020, entre outros.

Ata o de agora dirixiu seis teses de doutoramento e publicou numerosos libros, capítulos e artigos científicos. Entre eles, o máis citado é El ocio turístico en las sociedades industriales avanzadas.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.