Venres 29 Marzo 2024

Máis de 400 participantes en Compostela na Reunión da Sociedade Española de Física

A Real Sociedade Española de Física (RSEF) iniciou este luns na USC o programa da súa Reunión Bienal coa presenza en Compostela de máis de 400 estudosos/as e profesionais da Física. Esta é unha xuntanza que se celebra dende 1930 e que este ano se desenvolve conxuntamente co 27ª Encontro Ibérico da Ensinanza da Física, coa reunión do Club Español de Magnetismo e a Xornada da Rede Española de Supercomputación.

Mesa presidencial do evento.
Mesa presidencial do evento.

O programa comezou na Aula Magna da Facultade de Química, sede da Reunión, cunha serie de conferencias plenarias de Josef Ongena, Teresa Rodrigo (Universidade de Cantabria/CERN) e Paolo Giubelino (GSI/FAIR). A primeira hora da tarde, dende ás 15.15 horas, comezan unha serie de simposios simultáneos que na xornada do luns estan dedicados a física nuclear, física de partículas e teórica, enerxía e sustentabilidade, aplicacións e materiais magnéticos, electrónica molecular, física da atmosfera e do océano, información cuántica e termodinámica. Tamén de xeito paralelo comeza o Encontro Ibérico de Ensinanza da Física.

Publicidade

Homenaxe a José Rivas
O mesmo luns 17, tras a clausura do simposio do Club Español de Magnetismo (CEMAG) está previsto un acto homenaxe ao profesor José Rivas, ex presidente e actual socio honorario do club. Esta sesión comeza ás 19.00 horas na propia Facultade de Química.

José Rivas é  membro destacado do grupo de investigación Magnetismo e Nanotecnoloxía da USC (Nanomag), ademais de coordinador do grupo de Nanopartículas e nanoestruturas no Laboratorio Ibérico Internacional de Nanomateriais, situado en Braga, do que foi o seu primeiro director. En 1982 accede á unha praza de cátedra na USC e catro anos despois comeza unha nova liña de traballo cun equipo interdisciplinar da USC relacionada coa síntese e caracterización de materiais magnéticos nanoestruturados. Como resultado destas investigacións, fundaron un laboratorio interdisciplinario de Nanotecnoloxía e Magnetismo, onde desenvolveron varios métodos orixinais para a preparación de nanopartículas magnéticas coas súas correspondentes patentes para América e Europa. Este laboratorio creou unha spin-off de alta tecnoloxía denominada NANOGAP, da que José Rivas é co fundador. Ademais, o Ministerio de Industria español outorgoulle un premio nacional de innovación a esta spin-off pola súa ampla gama de partículas de calidade.

Programa do martes
Para o martes, o programa comezará cunha sesión transversal dedicada á investigación en Física en España, con especial atención á implicación en infraestruturas científico técnicas singulares e a participación en organismos internacionais. Esta é unha xornada que buscar dar a coñecer as estratexias do Ministerio en canto ao fomento na participación en infraestruturas científicas tanto nacionais como internacionais, achegando a posibilidade de coñecer as inquedanzas das comunidades de usuarios e responsables destas infraestruturas.

Os simposios simultáneos deste martes estarán agrupados arredor dos bloques temáticos dedicados a física nuclear, física molecular nas fronteiras, física de partículas e teórica, astrofísica, comunicación e divulgación, enerxía e sustentabilidade ou tecnoloxías e materiais cuánticos, entre outros.

A Bienal
No encontro exporanse os grandes avances científicos e tecnolóxicos logrados nos últimos anos en distintos campos da Física a nivel internacional. A programación inclúe un total de dezaseis conferencias plenarias sobre temas estrela na fronteira da física impartidas por oradores de gran prestixio e con ampla representación internacional, entre eles o Premio Nobel de 2012 Serge Haroche. Ademais está prevista a celebración de tres sesións en formato de mesa redonda ou coloquio nas que se abordarán asuntos de grande interese para a comunidade científica como son a ensinanza e divulgación da Física; transferencia de tecnoloxía e emprendemento; e acceso e oportunidades de experimentación en instalacións singulares de investigación.

Esta edición, con sede na Facultade de Química, está organizada por profesorado da Facultade de Física da USC e socios da RSEF, coas profesores Dolores Cortina e Elena López Lago como presidenta e vicepresidenta da xuntanza, respectivamente. A RSEF é unha institución sen ánimo de lucro fundada en 1903 co fin de promover o desenvolvemento da Física no que atinxe ao coñecemento básico e as súas aplicacións así como fomentar a investigación científica e a ensinanza en todos os ámbitos educativos.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Galicia avanza para contar cos seus propios medicamentos CAR-T nos próximos anos

A finais de ano abrirá un centro de produción en Santiago e un proxecto de investigación traballa para aplicalos en tumores sólidos

Así era Castro Valente: a fotografía láser recrea a muralla da gran fortaleza medieval galega

Un estudo da USC usa as novas tecnoloxías para ampliar información sobre o xacemento de 10 hectáreas situado entre Padrón e A Estrada

O meteorito que brillou como cincuenta lúas cheas xa pode visitarse en Santiago

Tratouse dun asteroide de 1,15 metros de tamaño e 2,62 toneladas de masa que chocou contra a atmosfera a 15 Km/s

Unha tese galega demostra a viabilidade de reutilizar restos vinícolas e pesqueiros no país

Antonio Cortés avaliou a sustentabilidade das estratexias de valorización de residuos orgánicos, alén de estudar a ecoeficiencia dos procesos