O científico do CiQUS e profesor da USC Diego Peña colaborou co IBM Research Center neste artigo.

O científico do CiQUS e profesor da USC Diego Peña colaborou co IBM Research Center neste artigo.

Un traballo do CiQUS, entre os 10 artigos de Química máis innovadores do 2016

A revista británica 'Chemistry World' seleccionou unha colaboración do investigador Diego Peña con IBM

En agosto de 2015, un equipo de investigadores do CiQUS  da Universidade de Santiago de Compostela e da empresa IBM describiu nun traballo a metodoloxía que lles permitira observar por primeira vez a escala atómica unha reacción química coñecida como a Ciclación de Bergman, usando a técnica de Microscopía de Forza Atómica (AFM). O traballo, publicado na portada da revista Nature Chemistry, obtivo un grande impacto na súa área.

Este mes de xaneiro, de novo a revista Chemistry World (unha publicación que recolle as noticias máis relevantes da área, e editada pola Royal Society Of Chemistry), seleccionou esta investigación entre os dez mellores artigos máis innovadores do 2016, recoñecendo así unha vez máis o traballo do investigador do CiQUS Diego Peña Gil e os seus colegas do IBM Research Center en Zurich.

As imaxes obtidas mediante Microscopía de Forza Atómica (AFM) abraiaron ao mundo nos últimos anos. No seu traballo de 2016, os investigadores usaron esta técnica para explorar o mundo molecular con exquisito detalle. Nunha nova colaboración do profesor Diego Peña Gil cos seus colegas do IBM Research Center (liderados por Leo Gross, principal autor do traballo), os científicos conseguiron inducir unha reacción química reversible (a Ciclación de Bergman) sobre unha única molécula, utilizando pulsos de voltaxe aplicados coa punta dun microscopio de Efecto Túnel (STM), para posteriormente analizar os resultados mediante a técnica AFM. Os pulsos permitiron en primeiro lugar romper os dous enlaces carbono-bromo da molécula, e a continuación romper unha ligazón carbono-carbono común a dous aneis de seis membros, formando un único anel de dez membros. Un pulso adicional permitiu reverter o proceso, xerando de novo os aneis hexagonales, o que supón unha especie de conmutador molecular.

“Trátase dunha reacción fascinante”, asegura Peña. “A finais dos anos 80 observouse que o mecanismo de acción dalgunhas sustancias antitumorais estaba baseado nesta reacción, o que, naturalmente, atraeu unha grande atención da comunidade científica. Dende entón, esta converteuse nunha reacción moi coñecida no ámbito da química orgánica, polo que é unha gran satisfacción visualizala por primeira vez con resolución atómica”, conclúe.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.