Venres 29 Marzo 2024

Eva Dafonte: ‘Ás veces penso ‘estou no CERN!’… é algo tremendo traballar aquí’

Muller nun mundo de maioría masculina – oito de cada dez estudantes de informática son homes -, unha galega ao mando de decenas de científicos de todo o mundo, subdirectora do Servizo de Bases de Datos, que xestiona a inxente cantidade de información xerada no experimento máis grande do mundo. Máis dun xigabyte de datos a cada segundo, o que suporía, cada ano, poder poñer unha enriba da outra 4 torres de CDs da altura do Mont Blanc. Eva Dafonte Pérez (Ourense, 1979) leva xa 13 anos aquí.

– Como chega unha moza de Ourense ao CERN?

Publicidade

– Preparando o proxecto de fin de carreira na universidade, un compañeiro falounos do CERN e das oportunidades que ofrecía (a el comentárallo un primo seu de Castellón). Unha amiga e máis eu animámonos a enviar a solicitude para unha bolsa, tamén para outros centros de investigación. O CERN foi o primeiro en aceptar a solicitude, e así empecei cunha bolsa dun ano que se estendeu a tres, e despois un contrato de cinco anos como persoal, e despois o indefinido. E ata hoxe.

– Para explicarllo á xente: como contribúe a que isto funcione día a día?

– Traballo no grupo de bases de datos. Aquí encargámonos das bases de datos que se utilizan tanto para o funcionamento básico do CERN (control de entrada e accesos ao LHC, administración ou compras) como do control dos aceleradores (entre eles o LHC) e das aplicacións dos experimentos. Sen as nosas bases de datos, o acelerador de partículas non se pode poñer en marcha.

– Cando reflexiona sobre o que supón formar parte dun proxecto tan importante, que sente?

– A dicir verdade, cando chegas cada día a traballar cada día aquí, estás centrada na túa axenda, nos asuntos que tes que resolver ese día, dos proxectos que hai en marcha, e non che da tempo a pararte a pensar en onde estás. Pero claro, de súpeto paras, reflexionas e dis: ‘Que estou no CERN!’; e claro, é algo tremendo poder traballar aquí.

Temos moitas facilidades para adaptar a nosa xornada á vida familiar

– A porcentaxe de mulleres informáticas é pequena, e o mesmo acontece co persoal do CERN. Notaches algunha vez algún tipo de problema?

– Si é certo que aínda hai poucas mulleres, e iso que polo que eu vin e o que dicían antes de que eu chegara, a situación mellorou moito. Pero eu non podo dicir que tivera ningún problema en ningún momento. A nivel profesional, ao contrario; intentamos que entren máis mulleres. Cando nos chegan curriculums, procuramos intentar buscarlles acomodo ás mulleres que poidan encaixar ben nalgúns dos perfís que ofrecemos. E a nivel familiar, temos moitas facilidades para adaptar a nosa xornada á vida familiar. Eu teño dúas nenas, e sempre houbo disposición para reducir temporalmente as xornadas, cambiar algo os horarios, etc.

– Como percibe o talento e o traballo que aporta Galicia ao CERN?

– Chega moita xente e moi boa. Tanto desde Galicia como o resto de España, no CERN vese que os estudantes e profesionais que chegan aquí traen un nivel de formación e de competencias bastante alto.

– Como ve o futuro?

– Creo que este é o meu sitio. Cando viñen aquí, marchei de Ourense con algo de medo porque claro, é a túa primeira experiencia fóra da casa, pero agora penso que aquela foi a mellor decisión que puiden tomar. A miña vida está aquí e teño un traballo apaixonante.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Creada a primeira base de datos sobre o impacto das plantas invasoras en Europa

Investigadores do CSIC participan na plataforma Plantimpactseurope, que inclúe información de 104 especies de 29 países europeos

“Unha de cada 16 persoas coas que te cruzas a diario ten unha enfermidade rara”

O investigador do CSIC Lluís Montoliu explica a importancia de informar as familias e de crear grupos de apoio

O exdirector do CERN: “Somos tres partículas en distintas combinacións. Todo é física”

“O desafío actual é comunicar o que se está facendo”, afirma Rolf-Dieter Heuer, director do acelerador de partículas cando o descubrimento do bosón de Higgs

“A ciencia exoplanetaria axuda a comprender o excepcional que é a vida na Terra”

A astrofísica galega Minia Manteiga comparte cartel con Mariano Barbacid nun encontro no CERN de investigadores europeos