Explicación: catro raios láser cruzan esta imaxe abraiante da nebulosa de Orión, tal e como se ve desde o Observatorio Paranal do ESO no deserto de Atacama, no planeta Terra. Os láseres, que non forman parte de ningún conflito interestelar, están a seren usados para unha observación de Orión por UT4, un dos telescopios moi grandes do observatorio, nun exame técnico dun sistema de óptica adaptativa para a mellora da imaxe. Esta vista da nebulosa con raios láser foi captada por un telescopio pequeno desde fóra do peche do UT4. Os raios poden verse desde esa perspectiva porque nos primeiros quilómetros sobre o observatorio a atmosfera da Terra, menos densa, esparexe a luz láser. Os catro segmentos pequenos que aparecen máis alá dos raios son a emisión dos átomos de sodio excitados pola luz láser nunha capa atmosférica a alturas superiores aos 80-90 quilómetros. Eses segmentos, desde a perspectiva do UT4, forman manchas brillantes ou estrelas guías artificiais. As súas fluctuacións empréganse en tempo real para corrixir as distorsións atmosféricas ao longo da liña de visión medianta o control dun espello deformable no camiño óptico do telescopio.