Explicación: que vén sendo toda esa conmoción na nebulosa do Cágado? Unha formación estelar. A emisión poeirenta na nebulosa do Cágado, IC 410, atópase a uns 12.000 anos luz de distancia na constelación setentrional do Carreteiro (Auriga). A nube de gas brillante ten uns 100 anos luz de diámetro, esculpidos por ventos estelares e radiación procedente do cúmulo estelar aberto NGC 1893 incrustado. Formado na nube interestelar hai tan só 4 millóns de anos, as estrelas brillantes recén formadas do cúmulo vense todo ao redor da nebulosa de formación estelar. Preto do centro da imaxe destacan dúas correntes relativamente densas de material procedente das rexións centrais da nebulosa. Estas formas de cágado cósmico, lugares posibles de futura formación estelar en IC 410, teñen uns 10 anos luz de lonxitude. A imaxe publicada foi tirada en luz infravermella polo satélite Wide Field Infrared Survey Explorer (WISE ou “Explorador de Sondaxes en Infravermellos de Amplo Campo) da NASA.