Explicación: cando se semella o Sol a unha flor? Nunha cor específica de luz vermella emitida polo hidróxeno, tal e como se amosa aquí, algunhas rexións da cromosfera solar poden semellarse a unha rosa. A imaxe en cores invertidas tirouse en outubro de 2014 e amosa a rexión solar activa 2177. Os pétalos que dominan o cadro son realmente tubos de plasma confinados magneticamente chamados fibrilas, algunhas das cales se estenden con maior lonxitude có diámetro da Terra. Na rexión central moitas destas fibrilas vense de canto, mentres que as rexións do arredor están normalmente cheas de fibrilas curvas. Cando se ollan sobre o limbo do Sol, estes enormes tubos de plasma denomínanse espículas, e cando acontecen en rexións pasivas reciben a denominación de manchas. A rexión de manchas solares 2177 sobreviviu durante varios días máis antes de que o complexo e axitado campo magnético furase a superficie do Sol e evolucionase de novo.