Festa de novas estrelas na galaxia NGC 3310

Explicación: aínda hai festa na galaxia espiral NGC 3310. Haberá uns 100 millóns de anos, NGC 3310 probablemente colisionou cunha galaxia máis pequena facendo que a gran galaxia espiral se acendera cun tremendo estoupido de formación estelar. Os cambios gravitatorios durante a colisión crearon ondas de densidade que comprimiron as nubes existentes de gas e desencadearon a festa de formación estelar. A imaxe publicada desde o Telescopio Gemini Norte amosa a galaxia moi polo miúdo con cores codificadas, de xeito que o rosa salienta o gas mentres que o azul salienta as estrelas. Algúns dos cúmulos estelares da galaxia son bastante novos, indicando que as galaxias de estoupido estelar poden ficar nese modo de estoupido de estrelas durante bastante tempo. NGC 3310 abarca uns 50.000 anos luz, estando a uns 50 millóns de anos luz de distancia, resultando visible cun telescopio pequeno cara a constelación da Osa Maior.