Dione, aneis, sombras e Saturno

Explicación: que está a pasar nesta estraña xustaposición de lúa e planeta? O primeiro e máis importante, a lúa de Saturno Dione foi captada nunha panorámica espectacular pola sonda espacial automática Cassini que actualmente está a orbitar ao planeta xigante. A propia lúa, brillante e chea de cráteres, abarca uns 1.100 km, co gran cráter Evander con moitos aneis visible no extremo inferior dereito. Como os aneis de Saturno poden ollarse case de canto, só son visibles directamente coma unha delgada liña horixontal que pasa por tras de Dione. Porén, arqueándose polo fondo da imaxe, están as sombras dos aneis de Saturno, que amosan parte da súa rica textura que doutro xeito non se podería ollar directamente. No fondo, unhas pocas estruturas nubosas poden contemplarse sobre Saturno. A imaxe publicada foi tirada durante o último sobrevoo de Dione planificado pola Cassini, xa que está programado que a sonda espacial se mergulle no interior da atmosfera de Saturno durante 2017.