Explicación: isto e ao que semella Saturno desde o interior dos aneis. A semana pasada, por vez primeira, a NASA dirixiu á sonda espacial Cassini a cruzar entre Saturno e os seus aneis. Durante o mergullo, a sonda automática tirou centos de imaxes que amosan nun detalle sen precedentes as estruturas da atmosfera de Saturno. Porén, mirando cara o exterior, a sonda foi quen de captar vistas impresionantes. Na imaxe publicada tirada unhas poucas horas antes do seu máximo achegamenteo, pode verse o estraño hexágono setentrional de Saturno ao redor do polo norte. O anel C é o máis próximo que se olla, mentres que a escura división de Cassini afasta a parte interna do anel B da externa do A. Unha inspección polo miúdo dará conta de dúas pequenas lúas que pastorean o anel F, o anel máis afastado que se albisca. Esta imaxe é en cru e será verificada oficialmente, calibrada e publicada en data posterior. A Cassini mantén o calendario para rematar a súa misión mergullándose na atmosfera de Saturno o 15 de setembro.