Explicación: como sería achegarse a Xúpiter? Para axudar a responder isto un equipo de 91 astrofotógrafos afeccionados tiraron unhas 1.000 fotografías de Xúpiter desde a Terra, aliñando e unindo dixitalmente as imáxenes resultantes no vídeo secuencia publicado. A captura de fotografías comezou en decembro de 2014 e durou uns tres meses. A secuencia ficticia resultante do achegamento ten semellanzas co que viu a sonda espacial Juno da NASA cando se achegou por vez primeira ao mundo xoviano no pasado xullo. O vídeo comeza con Xúpiter aparecendo coma un orbe pequeno preto do centro da imaxe. Mentres Xúpiter se aproxima desde abaixo, o planeta achégase facéndose máis grande mentres a rotación das súas bandas nubradas se fai máis aparente. A minguada Gran Mancha Vermella do planeta rota nas imaxes dúas veces, amosando ás veces actividade fóra do normal. Poden verse moitos óvalos brancos que se moven ao redor do planeta xigante. O vídeo remata cando a nave imaxinaria pasa por riba do polo norte de Xúpiter.