Explicación: ao sur de Antares, na cola da constelación Scorpius (rica en nebulosas), atópase a nebulosa de emisión IC 4628. As estrelas masivas, achegadas e quentes, con só millóns de anos de idade, irradian á nebulosa con luz ultravioleta invisible que arrinca os electróns dos átomos. Ao final, os electróns recombínanse cos átomos para producir o brillo nebular que ollamos, dominado pola emisión vermella do hidróxeno. A rexión, á distancia estimada de 6.000 anos luz, abarca unhas tres lúas cheas no ceo. A nebulosa tamén é catalogada coma Gum 56 polo astrónomo australiano Colin Stanley Gum, pero os astrónomos amantes do marisco poderían coñecer esta nube cósmica coma a nebulosa da Gamba. A sedutora imaxe en cor é unha nova composición astronómica que emprega datos do cámara de amplo campo OmegCAM do Observatorio Europeo Meridional (ESO) e imaxes de afeccionado feitas baixo os escuros ceos da illa canaria de Tenerife.